Қазақстанда карантин тәртібін енгізу туралы қаулы жобасы әзірленуде

Қазақстанда карантин тәртібін енгізу туралы қаулы жобасы әзірленуде

Қазақстан шектеу шараларын енгізу қағидалары мен карантин жарияланатын инфекциялық аурулардың тізімін бекітуді жоспарлап отыр. Тиісті бұйрықтың жобасы нормативтік құқықтық актілер порталында жарияланды. Шектеу шараларын жүзеге асыру қағидалары «Халық денсаулығы және денсаулық сақтау жүйесі туралы» Кодекске сәйкес әзірленді. Құжатта инфекциялық аурулардың таралуын болдырмауға бағытталған және карантин кезінде кәсіпкерлік және өзге де қызметтің ерекше режимін көздейтін шаралар қамтылған.

Сонымен қатар, шектеу шараларын, оның ішінде карантин жариялауға әкеп соғатын инфекциялық аурулардың тізімі бекітіліп отыр. Олар оба, тырысқақ, сары қызба, вирустық геморрагиялық қызбалар, ауыр жіті респираторлық синдром (АЖРС), вирустың жаңа кіші типі тудырған адам тұмауы, вирустың жаңа кіші типі тудырған коронавирустық инфекция сынды барлығы 7 ауру түрі.

«Инфекциялық және паразиттік аурулардың Қазақстан аумағына әкеліну немесе таралу қаупі төнген жағдайда, Қазақстанның бас мемлекеттік санитарлық дәрігері Еуразиялық экономикалық одақтың кедендік шекарасымен тұспа-тұс келетін Қазақстанның мемлекеттік шекарасы арқылы өткізу пункттерінде немесе елдің бүкіл аумағында кәсіпкерлік және өзге де қызметтің, халықтың өмір сүруінің ерекше жағдайларымен шектеу шараларын, оның ішінде карантин енгізеді», - делінген бұйрық жобасында.

Тізімге енбеген инфекциялық аурулардың таралу қаупі төнсе, жекелеген аумақтарда карантин Қазақстанның бас мемлекеттік санитарлық дәрігерінің немесе тиісті әкімшілік-аумақтық бірліктің (көліктегі) бас мемлекеттік санитариялық дәрігерінің қаулысымен, сондай-ақ өзге де мемлекеттік органдардың ведомстволық объектілерінде құрылымдық бөлімшелердің бас мемлекеттік санитариялық дәрігерінің шешімімен жарияланады.

Инфекциялық аурулардың таралуын болдырмауға бағытталған шектеу шаралары кезінде ел аумағына кіріп-шығу, өңірлер арасындағы қозғалыс шектеліп, митингтер, бұқаралық, мәдени, спорттық шаралар, той-томалақ өткізуге тыйым салынады. Кәсіпкерлік және басқа да қызмет нысандарының жұмысы шектеледі.

Айта кетейік, тиісті бұйрықтың жобасы осы жылдың 28 тамызынан бері талқыланып жатыр. Талқылау 14 қыркүйекке дейін созылады.

Авторы: Жеңіс

 

Фото: matritca.kz