Қазақстандық сарбаздар Мәскеуде өтетін мерейтойлық шеруге қатысады

Қазақстандық сарбаздар Мәскеуде өтетін мерейтойлық шеруге қатысады

Нұр-Сұлтан қаласында Құрлық әскерлерінің сарбаздары Мәскеуде өтетін Жеңістің 75 жылдығына арналған мерейтойлық шеруге қызу дайындалып жатыр. Жыл сайын қызыл алаңда өтетін дәстүрлі шара жаһандық пандемияға байланысты кейінге шегерілгендігі белгілі. Даңқты ардагерлердің құрметіне тағзым ету салтанатына қазақстандық әскерилер ресейлік тараптың арнайы шақыруымен қатысады.

Қазіргі уақытта үш жаяу шеру есебі құрылды. Атап айтқанда, олардың екеуі десанттық–шабуылдаушы әскерлер бөлімшелерінің құрамынан, енді біреуі Құрлық әскерлері Әскери институтының 3-курс курсанттарынан жасақталды.

«Биыл Жеңіс күніне 75 жыл толады. Осы себепті Ресей Қорғаныс министрлігі  біздің әскерлерді Қызыл алаңдағы парадқа қатысу үшін шақырды. Құрлық әскерлерінен үш есеп топ бөлінді. Есептер өте жақсы дайындалған. Олар барлық санитарлық-гигиеналық талаптарды сақтайды. Күніне үш-төрт рет температуралары өлшеніп, басқа да мәселелер шешіледі. Бізге Қызыл алаңдағы парадқа қатысып, елімізді көрсету өте маңызды. Дайындық өте жақсы жүріп жатыр», – дейді Құрлық әскерлері бас қолбасшысының жауынгерлік даярлық жөніндегі орынбасары генерал-майор Дәулет Оспанов.

Әскери қызметшілер үшін Ұлы Жеңістің құрметіне арналған шеруге  қатысу – бұл бүгінгі бейбіт күніміз үшін жаумен арпалысқан батырларға алғыс білдіру және құрмет көрсету мүмкіндігі. Дайындыққа қатысушылардың арасында аталары Ұлы Отан соғысының майдан даласында жеңіс үшін шайқасқандар да, Мәскеудегі Жеңістің алғашқы шеруіне қатысқандар да бар.

«Мен Ұлы Отан соғысының ардагері Балғымбаев Айдарбай Наурызбайұлының немересімін. Десанттық-шабуылдаушы әскерлері арасындағы салтанатқа қатысу үшін қатаң іріктеуден өтіп, Мәскеуде өтетін Ұлы Жеңістің 75-жылдығына арналған шеруге қатысатыныма қуаныштымын», – дейді 35-ші гвардиялық десант-шабуылшы бригадасының әскери қызметшісі Серікбек Балғымбаев.

Дайындық карантиндік шараларды қатаң сақтай отырып жүзеге асырылады. Дезинфекциялық-санитарлық режим күшейтілді: күніне кемінде екі рет жеке құрамды медициналық тексеру, сондай-ақ өңдеу, ылғалдандыру және желдету жүргізіледі. Парадқа қатысатын әскери қызметшілер қалған жеке құрамнан оқшауланған, оларға бөгде адамдар мен туысқандарының  баруы шектелген.

Авторы: Жеңіс Ермұқанов 

 

Фото: 24.kz