Мәжіліс бейбіт жиналыстар туралы заң жобасына сенаторлар енгізген өзгерістерді қолдады

Мәжіліс бейбіт жиналыстар туралы заң жобасына сенаторлар енгізген өзгерістерді қолдады

Мәжіліс депутаттары «ҚР-да бейбіт жиналыстарды ұйымдастыру және өткізу тәртібі туралы» заң жобасына Парламент Сенаты енгізген өзгерістер мен толықтыруларды қолдап, дауыс берді.

«Атап айтқанда республикалық маңызы бар қалалардың, елорданың және облыстық маңызы бар әкімшілік орталық аудандарында бейбіт жиналыстарды ұйымдастырудың арнайы орындарының міндетті санын белгілеу, тұрмыс-тіршілік нысандарының, көлік пен өзге де инфрақұрылымның жұмыс істеуінің бұзылуы, азаматтардың еркін жүріп-тұруына кедергі келтіру сияқты бейбіт жиналысты өткізуден бас тарту негізін алып тастау ұсынылады. Өйткені мұндай кедергілерді билік нақты әрі арнайы орынды белгілеу кезінде ескеруі және олардың алдын алуы тиіс», - деді Заңнама және сот, құқықтық реформа комитетінің мүшесі, депутат Қанат Мусин Мәжілістің жалпы отырысында.

Мәжіліс депутаты егер мұндай бұзушылықтар жойылса, бейбіт жиналысқа жекелеген қатысушылардың құқыққа сыйымсыз әрекеттеріне байланысты жиналысты тоқтатуды болғызбау және бейбіт жиналыс барысында денсаулықты қорғауға арналған жеке қорғаныс құралдарын пайдалануға рұқсат беру ұсынылатынын мәлім етті.

Сонымен қатар заң жобасының жекелеген нормаларының құрылымын жетілдіру мақсатында түзетулер енгізілді.

 

Фото: inform.kz