Орталық Азия бойынша ұсынымдар жария етілді

Орталық Азия бойынша ұсынымдар жария етілді

Халықаралық қатынастар бойынша Еуразиялық кеңес Еуропалық одақтың Орталық Азия бойынша жаңа стратегиясына арналған өз ұсынымдарын жария етті. Құжатқа Еуроодақтың Орталық Азиямен 2020-2027 жылдар аралығында байланысты нығайтуға бағытталған идеялары енген. Жаңа стратегияда Еуроодақтың аймақ бойынша жоспары түзілді. Қарым-қатынастың тиімді тұстары мен бәсекелес тараптарды шынайы бағалауға мән берілген. Бұл – тәжірибелік ұсынымдардың бір парасы ғана дейді құжаттың авторлары.

ПИТЕР БУРИАН, ОРТАЛЫҚ АЗИЯ БОЙЫНША ЕУРООДАҚТЫҢ АРНАЙЫ ӨКІЛІ:

 - Қазақстан – біздің негізгі сауда әріптесіміз және Еуроодақ сіздердің елдегі ең алғашқы инвестор. Бұл біздің қарым-қатынасымыздың қандай деңгейде екендігін айқындайды деп ойлаймын. Біз бұл байланысты одан әрі нығайтуға ниеттіміз.

Баяндаманың таныстырылымына Халықаралық қатынастар бойынша Еуразиялық кеңес жанындағы Консультативті кеңес мүшелері: беделді саясаткерлер – Еуропалық мемлекеттердің бұрынғы президенттері мен министрлері, британиялық БАҚ және қазақстандық дипломатиялық корпус өкілдері қатысты.

РОМАН ВАСИЛЕНКО, ҚР СЫРТҚЫ ІСТЕР МИНИСТРЛІГІНІҢ ВИЦЕ-МИНИСТРІ:

 - Қазақстан Еуропалық одақпен одан әрі стратегиялық қарым-қатынас орнатуға мүдделі. Бұл қарым-қатынас кеңейтілген әріптестік байланыс негізінде құрылады және жуырда толығымен күшіне енеді деп сенеміз.

Халықаралық қатынастар бойынша Еуразиялық кеңес – Орталық Азияға маманданған тәуелсіз ақылдастар алқасы. Кеңес мүшелерінің айтуынша, болашақта оның жұмысы аймақ танымалдылығын арттырып, Еуропа мен Орталық Азия елдері арасындағы экономикалық және саяси байланыстарды нығайтуға бағыттала бермек.