Қазақстанда Үкіметтік емес ұйымдар академиясы құрылады

Қазақстанда Үкіметтік емес ұйымдар академиясы құрылады

Қазақстанда Үкіметтік емес ұйымдар академиясы жобасы жүзеге асырылады. Бұл туралы «Даму тарихы: ішкі көзқарас» атты 11-ші халықаралық конференцияда ҚР Ақпарат және қоғамдық даму министрлігі Азаматтық қоғам істері комитетінің төрағасы Мадияр Қожахмет айтты.

«Үкіметтік емес ұйымдарды кәсібилендіру бойынша шаралар қабылдау жоспарланып отыр. Тұрақты әрі бәсекеге қабілетті үкіметтік емес ұйымдарды дамыту үшін «Үкіметтік емес ұйымдар академиясы» деп аталатын жоба құру жоспарланған. Академияның құрылуы бұл сектордың дамуы үшін жақсы алғышарттар жасап, үкіметтік емес ұйымдардың басшылары мен қызметкерлерінің құзіреттілігін арттырады деп ойлаймыз», - деді Мадияр Қожахмет

Оның атап өтуінше, «Асар» бизнес пен мемлекеттің үшжақты серіктестігі тұғырнамасы тұрақты түрде жұмыс істейтін болады. Аталған тұғырнама аясында бизнеспен бірге әлеуметтік бастамаларды дамыту көзделген. Сондай-ақ, ауылдық үкіметтік емес ұйымдардың да қызметін жандандыру бойынша жұмыстар жүргізіліп жатыр.

«Еліміздің барлық өңірлерінде ауылдық үкіметтік емес ұйымдардың әлеуетін арттыру жобалары жүзеге асырылуда», - деді комитет төрағасы.

 

 

Фото: pavlodarnews