Қазақстан Жібек жолы форумында

Қазақстан Жібек жолы форумында

Жаңа Жібек жолының болашағы зор. Еске сала кетейік, Осыдан 5 жыл бұрын Астанада жалпақ жұртқа жария болған Қытайдың «Бір белдеу, бір жол» бастамасы қазір Еуразия құрлығының көптеген елдерін біріктірді. Парижде Жібек жолын жаңғырту жайы талқыға түсті. Нобель сыйлығының лауреаты Джеффри Сакс бастаған әлемнің жетекші сарапшылары Жаңа Жібек жолының экономиканы дамытудағы мүмкіндіктерін талқыға салды. Негізгі басымдық – инвестиция. Жобаға қатысушылар өзара қарым-қатынасты нығайтып қана қоймай, бірлесе дамудың даңғыл жолына ұмтылуда. Алайда елге қаржы тарту жеткіліксіз. Ең бастысы одан мемлекетке келер пайданы ойлау керек. Мамандар бүгінгі таңда мемлекетаралық қарым-қатынастың маңызды екенін алға тартады.

БАЛАШ ХОРВАТ, БҰҰ ДАМУ БАҒДАРЛАМАСЫНЫҢ СТРАТЕГИЯЛЫҚ КЕҢЕСШІСІ:

-  Қарым-қатынас құру тек екіжақты зерттеулерден тұрмайды. Бұл толыққанды ашық алаң болуы керек. Сол арқылы сараптамалық орталықтар арасындағы байланыс нығайып, өзара оқу әрі тәжірибе және пікір алмасу болады.

Париждегі жиынға Қазақстан атынан әлемдік экономика және саясат институтының қызметкерлері қатысты. Олар «Бір белдеу, бір жол» аясындағы еліміздің тәжірибесін ортаға салып, өз зерттеулерін ұсынды.  

ЕРЖАН САЛТЫБАЕВ, ӘЛЕМДІК ЭКОНОМИКА ЖӘНЕ САЯСАТ ИНСТИТУТЫНЫҢ ДИРЕКТОРЫ:

 - Жалпы зерттеу нәтижесі Орталық Азиядағы барлық елдердің бұл жобаға дендеп енгенін көрсетті. Олардың барлығында Қытай инвестициясы бар. Бұл мемлекеттерде Қытай капиталының араласуымен түрлі жобалар жүзеге асып жатыр.

Жоба жүзеге асырылғалы бері, қазақстандық өнеркәсіп пен ауыл шаруашылығына 64 млрд доллар инвестиция тарту туралы келісімдер жасалды. Аспан асты елінің қаржысы Қазақстанның экономикасын ғана емес, аймақтың да дамуына мүмкіндік ашуы тиіс.