Арменияда «Абай-175» жыйнагы тааныштырылды

Арменияда «Абай-175» жыйнагы тааныштырылды

Арменияда Абай Кунанбай уулунун 175 жылдыгына карата жарык көргөн жыйнактын бет ачары өттү. Мааракелик басылма эки китептен турат: «Кара сөздөр» жана Мухтар Ауезовдун жаңыланган редакциясындагы «Абай жолу». Адабий жыйнак Казакстандын Армениядагы элчилигинин демилгеси менен Руханий жаңыруу программасынын алкагында Ереван мамлекеттик университетинин жана белгилүү армян басмаканасынын колдоосу менен жарык көргөн.

Иш-чараны ачып жатып Казакстандын элчиси Тимур Оразаев М.Ауезовдун «Абай жолу» романы биринчи жолу 1952-жылы армян тилинде жарык көрүп, сейрек кездешүүчү библиографиялык чыгармага айланганын айтты. Заманбап армян тилиндеги экинчи басылма чыгармачыл топ тарабынан жаңы тилде басылып чыккан, ошондой эле, азыркы армян тилинин принциптерине, анын ичинде редакторлордун тарыхый жана филологиялык эскертүүлөрүнө ылайык түзүлгөн.

«Абай улуу казак талаасындагы биринчи жана теңдешсиз  акын жана философ. Абайдын адабий чыгармасы ошол эле учурда анын ар түрдүүлүгү жана уникалдуулугу менен таң калтырды», - деди Армениянын Билим берүү, илим, маданият жана спорт министринин орун басары Артур Мартиросян.

Армения Улуттук Жыйналышынын депутаты, «Казакстан-Армения» достук тобунун мүчөсү Арман Абовян: «Абай мага өзүнүн дүйнө таанымы, философиясы менен жакын. Ал өзүнүн ой-сырлары жана эмгектеринде Батыш менен Чыгышты байланыштырат» - деп билдирди.

Казакстан Жазуучулар Союзунун төрагасынын орун басары Бауржан Жакыптын айтымында, Абайдын «Кара сөздөрү» армян тилинде басылып чыгышы, Армениядагы окурмандарга жана дүйнө жүзүндөгү миллиондогон армяндарга улуу казак акыны жана ойчулунун философиялык прозасы менен таанышууга мүмкүнчүлүк берет.

РКнын ТИМнин өзгөчө тапшырмалар боюнча Элчиси Батырхан Курмансеит бул жыйнак армяндардын илимий жана студенттик топтору үчүн баалуу материал, ошондой эле, кеңири аудитория үчүн кызыктуу адабий чыгарма болорун белгиледи.

Армян жана казак адистери жыйнакты басып чыгаруу үстүндө иштешти. Түрколог, профессор Александр Сафарян, котормочу Арман Сафарян, акын-котормочу Варужан Хастурдун эмгектери чоң. Басылманын атайын сүрөттөрүн казак архитектору Нурлан Буранбаев жасаган. Келечекте бул китептер Армениянын алдыңкы китепканаларына жана университеттерине, ошондой эле, Казакстандын илимий уюмдарына, фонддоруна жана университеттерине жеткирилет. Ошондой эле, күзүндө армян тилинде Абай-175 жыйнагынын электрондук нускасын - Kindle, iOS жана Android үчүн чыгаруу мерчемделүүдө.

 

Фото: inform.kz


×