#Абай175: британиялыктар поэтикалык марафонго кошулушту

#Абай175: британиялыктар поэтикалык марафонго кошулушту

Абайдын туулган күнү – баш оонанын 10-күнүнүн алдында британиялыктар анын 175 жылдыгынын урматына челленджди колдошту. Саясатчылар, окумуштуулар жана чыгармачыл интеллигенция өкүлдөрү казак ойчулунун чыгармаларын англис тилинде окушту жана социалдык тармактарга видеороликтерди жайгаштырышты. Мисалы, британ парламентинин депутаты – консерватор Боб Стюарт «Пайданы эмес, намысты ойло» ырынан үзүндү окуду. Челлендждин дагы бир катышуучусу Абердин шаарынын лорд-мэри Барни Крокетт адамзаттын болочок тагдыры жөнүндөгү Абайдын ойлорун бөлүшкөн. Британиялык жогорку саясий чөйрөнүн өкүлүнүн айтымында, анын мекендеши Шекспир сыяктуу эле казак акынынын поэзиясына бардык мезгилдерде талап жогору.  

Эске салсак, Абайдын 175 жылдыгына карата челлендж Мамлекет башчы Касым-Жомарт Токаев тарабынан башталган. Улуу акындын чыгармаларын көркөм окуу боюнча поэтикалык марафонду Азербайжан, Татарстан, Кыргызстан, Жапония, Өзбекстанда колдоого алышты, ошондой эле,  Франция жана АКШ элчилери, мамлекеттик жана коомдук ишмерлер биригишти.

Ошол эле учурда британиялык акын, жазуучу жана котормочу Джон Фарндон азыр «Абай» операсын англиялык көрүүчүлөргө тааныштыруунун үстүндө иштеп жатат.

«Азыр Ахмет Жубановдун «Абай» операсын которуунун үстүндө иштеп жатам. Биз бул операны Улуу Британияга биринчилерден болуп кийинки жылы Казакстан элчилигинин колдоосу менен алып келүүгө үмүттөнүп жатабыз. Мен Абайдын чыгармачылыгы менен жакшы таанышмын жана бул челленджге кубануу менен катышып жатам», - деп белгиледи Джон Фарндон.

Айта кетсек, Казакстандын Улуу Британиядагы элчилиги Абайдын 175 жылдыгына карата бир нече иш-чараны пландаган. Анын ичинде, жыл соңунда акындын чыгармаларынын жаңы жыйнагынын бет ачары болот. Андан соң китептер англис тилинде басылат. Мындан тышкары, казакстандык жана британиялык аткаруучулардын онлайн-концерти уюштурулат. 

«Абайдын ар бир ыры адамзатты сүйүүгө чакырат. Ошондуктан биз аны дүйнөнүн башка элдери менен бөлүшүүнү туура деп эсептейбиз. Ошентип биз Абайдын мурасын жайылтууга чакан салым кошо алабыз деп үмүттөнөбүз», - деп Казакстандын Улуу Британиядагы элчилигинин катчысы Камшат Кумисбай баса белгиледи.

 

Фото: 24.kz


×