Швейцарияда «Абай окуулары» өттү

Швейцарияда «Абай окуулары» өттү

Казакстандын улуу акыны жана ойчулу Абай Кунанбай уулунун 175 жылдык мааракесинин алкагында Казакстандын Швейцариядагы элчилиги «Абай окууларын» уюштурду.

«Орус эли үчүн Толстой, англис тилдүүлөр үчүн Шекспир, немистер үчүн Гёте кандай бааланса казак эли үчүн Абай да ошондой урматка ээ. Эгерде дүйнө Абай жөнүндө жана анын казак маданияты менен адабиятына кошкон салымын билсе, анда казак адабияты дүйнөлүк классикалык адабиятта татыктуу орунду ээледи деп айта алабыз», - деп маалымдады Казакстан элчиси Алибек Бакаев.

Ал эми Цюррих университетинин Антропология жана коомдук илимдер бөлүмүнүн башчысы, казак тилин өздөштүргөн профессор Петер Финке Абай чыгармасы казак адабияты жана тарыхы үчүн абдан баалуу экенин белгиледи.

Швейцариянын академиялык коомчулугунун өкүлдөрү, Абайдын чыгармачылыгына суктанган швейцариялык адамдар, ошол мамлекетте окуп жаткан казак студенттери, казак диаспорасынын өкүлдөрү Абайдын чыгармаларын казак, француз жана немис тилдеринде окуп беришти.

Оpen-air ачык асман форматындагы иш-чара Альпы тоолору жана белгилүү Люцерн көлү менен курчалган эски Мегган сарайынын жанында өттү.

«Коронавирус пандемиясына байланыштуу мындай формат абдан ыңгайлуу жана ылайыктуу болду, анткени Абайдын ырлары табият койнунда өзгөчө окулат. Улуу казак акынынын элесине арналган Абай окуулары жылуу маанайда өтүп, казак адабиятын даңазалаган жана бардык катышуучулар үчүн жагымдуу эскерүүлөрдү калтырды», - деп кабарлайт РКнын Тышкы иштер министрлигинин басма сөз кызматы.

 

Фото: inform.kz


×