Казакстандын 100 жаңы ысымы: Нуржан Жолдыбалинов

Казакстандын 100 жаңы ысымы: Нуржан Жолдыбалинов

Казакстандын ар тараптан өнүгүшүнө өз салымын кошуп, үлгү болгон жарандар. Бул – «100 жаңы ысым» долбоорунун жеңүүчүлөрү. Аталган сынак канчалаган өнөрлүү, билимдүү, жигердүү казакстандыктарды өлкөгө таанытууга мүмкүнчүлүк берди. Курчаган чөйрөнү коргоо багытында кызмат кылып жүргөн Татьяна Немцанды долбоорго былтыр Акмола облусунун мугалимдер коому сунуштаган. 31 жыл бою Арнасай айылындагы орто мектептин мүдүрү кызматын аткарып келе жаткан Татьяна балдарды окутуу менен гана чектелбестен, экологиялык маселелерди изилдөөгө бел байлаган.

ТАТЬЯНА НЕМЦАН, КООМДУК МААНИЛҮҮ ДЕМИЛГЕЛЕРДИ ӨНҮКТҮРҮҮ ФОНДУ ТӨРАГАСЫНЫН ОРУН БАСАРЫ:

- Биз мектептин алдында бейөкмөт уюмун ачтык. Бир нече грант жеңип алдык. Ал каражаттын эсебинен айылдагы булактарды калыбына келтирдик. Мектепте күнөскана жасадык. Өзүбүз имаратты жылытуу системасын ойлоп таап, колдонууга киргиздик.

Бүгүнкү күндө Татьяна Немцан Коомдук маанилүү демилгелерди өнүктүрүү фондунда иштейт. Анын айтымында, өлкөнүн өнүгүүсүнө ар бир казакстандык салым кошо алат.

ТАТЬЯНА НЕМЦАН, КООМДУК МААНИЛҮҮ ДЕМИЛГЕЛЕРДИ ӨНҮКТҮРҮҮ ФОНДУ ТӨРАГАСЫНЫН ОРУН БАСАРЫ:

- Албетте, долбоордун жеңүүчүлөрүнүн катарында экенимди билгенимде абдан кубандым. Дал ошол мезгилде өзүмдүн өмүр бою алектенип келе жаткан ишим канчалык маанилүү экенин түшүндүм. Менин элдин алдындагы жоопкерчилигим өстү.

«100 жаңы ысым» долбоору айрымдардын жылдызын жандырды, ал эми кээ бирөөлөрдүн жоопкерчилигин жогорулатты. Кийинки каарман милдеттүү түрдө экинчи топко кирет. Нуржан Жолдыбалиновдун ийгилиги китепканага тиешелүү калыптанган көнүмүш эрежелерди бузуп, чыныгы билим, илим жана ІТ тармагынын ордосу экенин далилдеди.

НУРЖАН ЖОЛДЫБАЛИНОВ, КИТЕПКАНАЧЫ:

- «Жүз жаңы ысымга» китепканачы кирди деген пиардын бир жолу деп атоого болот. Анткени, азыркы китепканачылар – мобилдүү. Алардын беделин көтөрүү керек. Өтө төмөн деңгээлге түшүп кетти. Батыш өлкөлөрүндө китепканачыларга көз караштар башкача. Ошондуктан, биз да ошол деңгээлге жетишибиз керек.

Нуржан мындан 11 жыл мурун улуттук академиялык китепканага кызматка келип, китептерди электрондук форматка өткөрө баштаган. Бүгүнкү күнгө чейин дал ушундай интернетке 46 миң китеп жүктөлгөн. Ушуга кошо, Казакстан китептерин латын арибине өткөрүү менен алектенип жүрөт.

НУРЖАН ЖОЛДЫБАЛИНОВ, КИТЕПКАНАЧЫ:

- 2025–жылдан тарта биздин өсүп келе жаткан балдар латын арибинде гана окуй башташат. Ал эми, 70-80-90-жылдары чыккан китептер кайрадан латын арибинде чыгарылбайт. Биздин программалар ошол китептерди 1-2 мүнөттө латын арибине которуп берет.

Бүгүнкү күндө «Жүз жаңы ысым» долбоорунун экинчи этабы жүрүп жатат. Нуржан бул жолу да улуттук сынакта татыктуу жарандар жеңишке жетерине ишенет.