«Нотр-Дам де Пари» мюзикли Борбор Азия өлкөлөрүндө казак тилинде көрсөтүлөт

«Нотр-Дам де Пари»  мюзикли Борбор Азия өлкөлөрүндө казак тилинде көрсөтүлөт

«Нотр-Дам де Пари»  мюзикли Борбор Азия өлкөлөрүндө казак тилинде көрсөтүлөт. Алдыдагы үч жылда артисттер Түркмөнстан, Өзбекстан, Тажикстан, Кыргызстан жана Азербайжан өлкөлөрүнүн сахналарында өнөр тартуулашат. Белгилей кетүүчү жагдай, мюзиклдин казакстандык нускасында сюжеттин багыты менен дүйнөлүк хитке айланган музыка чыгармалары өзгөрүүгө дуушар болбой, ошол калыбында калтырылган. Ал эми спектаклдер үчүн атайын костюмдар Казакстанда тигилди. Бул долбоорго 70ке жакын актер, ырчы, акробат жана бий жамааттары катышат.

ЖЕҢИС СЕЙДОЛЛА, «КАЗАККОНЦЕРТ» МАМЛЕКЕТТИК КОНЦЕРТТИК УЮМУНУН МҮДҮРҮ:

- Дүйнөнү таң калтырган бул мюзикл бүткүл ааламды багындырды. Аны 11 миллиондон ашуун көрүүчү көргөн. Бул мюзикл биринчи жолу казак тилинде жаңырат. Бул бир гана Казакстан үчүн эмес, Борбор Азия өлкөлөрү үчүн да чоң жетишкендик. Биздин башкы максатыбыз – дүйнөлүк эмгектерди жаштарга казак тилинде көрсөтүү.

Нотр Дам де Пари дүйнөдө эң белгилүү мюзиклдин бири катары саналат. Ошондой эле, эң ийгиликтүү мюзикл катары Гиннестин Рекорддор Китебине кирген. Ушул багытта, казакстандык артисттер чет өлкөлүк көрүүчүлөрдү музыка өнөрүнүн башка да эмгектери менен тааныштырат. Алар өздөрүнүн мукамдуу үндөрү жана хореграфиясы аркылуу дүйнөлүк коомчулукту багындырууга кызыктар.

ЕРНАР ЖУМАТАЕВ, ЖАШТАР ТЕАТРЫНЫН МҮДҮРҮ:

- Жаштар театры жаштар жылында көптөгөн долбоорлорду колго алып жатат. Биз Каракыпчак Кобыланды казак баатыры боюнча көрүнүштү сунуштагыбыз келет. Биз мюзикл жанрына терең маани берип жатабыз. Казак спектаклдерин Казакстан эле эмес, Азия жана Европа өлкөлөрүндө көрсөтүүнү мерчемдеп жатабыз.

Сүрөт astana.gov.kz сайтынан алынды.