Ұлттық экономика министрлігі бизнеске жүктеменің неліктен артқандығын анықтауы тиіс. Бұл туралы бүгін Үкіметтің кезектен тыс отырысында Премьер-Министр Бақытжан Сағынтаев мәлім етті.

«Құрметті әріптестер! Кешегі өздеріңіз қатысқан Үкіметтің кеңейтілген отырысында Елбасы тарапынан бірқатар сын-ескертпе айтылып, нақты тапсырма  берілді. Біз бүгін сол тапсырмаларды іске асыру үшін бағыт-бағдарымызды айқындап, тиісті шешімдерді қабылдауымыз керек. Ең алдымен Мемлекет басшысы дамудың ұзақмерзімді кезеңінде 5 пайыздық өсімді қамтамасыз етуді  тапсырды. Қазақстанның ұлттық технологиялық бастамасы деп аталатын 2025 жылға дейінгі стратегиялық даму  жоспарының басты мақсаты осы болуы тиіс. Елбасы атап көрсеткендей, бұған жетуге экономикамыздың мүмкіндігі де, әлеуеті де жеткілікті», – деді отырысты ашқан Үкімет басшысы. 

Осы орайда ол бизнес ахуалды жақсарту үшін  қабылданатын шараларға тоқталды.

«Мемлекет басшысы атап өткендей, бұл бағытта аз жұмыс атқарылған жоқ. Бірақ бизнес жүктеме артып келеді. Бір жағынан біз бизнес жүргізуді жақсарту үшін заңнамаға өзгерістер енгізіп, процедураларды жеңілдетудеміз. Соңғы 5 жылда рұқсат беру құжаттарын 3,2 есе қысқарттық. Екінші жағынан дәл осы кезеңде бизнестің мүддесіне қатысты нормативтік-құқықтық актілер керісінше 1,7 есеге артып кеткен. Оның 80 пайызы әкімдіктер мен мәслихаттардың актілері.  Ұлттық экономика министрлігіне  бұл мәселенің мән-жайын анықтауды тапсырамын», – деді Б.Сағынтаев.   

 

 

Дереккөз: Қазақпарат

Мәтінде қате таптыңыз ба? Тінтуірмен белгілеп, Ctrl + Enter басыңыз



Пікірлер