«Жаңы гуманитардык билим» долбоору алкагында которулган 18 китеп тааныштырылды

«Жаңы гуманитардык билим» долбоору алкагында которулган 18 китеп тааныштырылды

«Казак тилиндеги 100 жаңы окуу китеби. Жаңы гуманитардык билим» долбоору алкагында которулган 18 китеп Казакстандын аймактарында тааныштырылууда. Китептерге алгачкылардан болуп карагандылык студенттер ээ болушту. Долбоордун жардамы менен эми техникалык билим тармагында билим алып жаткан студенттер гуманитардык китептерди эне тилинде окушат. Жергиликтүү ЖОЖго которулган китептердин 1500 даанасы түштү. Алардын ичинде «Менеджмент», «Тил билимине киришүү», «Азыркы заманбап психологияга киришүү» сыяктуу англис тилинен казак тилине түз которулган китептер бар.

НУРСУЛТАН САРСЕНБЕКОВ, КМТУ АГА ОКУТУУЧУСУ:

- Биз эми техникалык багыттагы ЖОЖ болгон менен бардык адистиктеги студенттерге философиядан, дүйнө, саясат, дин таануу сыяктуу сабактардан дарс окуйбуз. Ушул убакка чейин көптөгөн китептер орус тилинде болгондуктан албетте, бул китептердин которулушу сонун жаңылык болуп жатат.

Казакстандын Президентинин буйругу менен дүйнөдөгү эң белгилүү авторлордун тандалган китептерин казак тилине которуу үчүн атайын жумушчу комиссиясы түзүлүп, мыкты котормочулар тандалып алынган. Аталган китептер актөбөлүк жаштарга да тааныштырылды.

АЙМАН МАХАНОВА, К.ЖУБАНОВ АТЫНДАГЫ ААМУ “РУХАНИЙ ЖАҢЫРУУ” КЕҢСЕСИНИН ДОЛБООРЛОЧУ МЕНЕДЖЕРИ:

- Окуу китептерди которууга өлкөбүздөгү эң мыкты 40 котормочу тандалып алынган. Бир текстти которууга 3  адам тартылды. Алардын бири китептин түп нусксасы жазылган тилди билсе, экинчиси казак тилинин адиси. Ал эми үчүнчүсү, китеп жазылган тармактын квалификациялуу адиси. Бул окуу китептер 2018-жылы окуу процессине киргизилет.

Казак тилине которулган 18 китеп быйыл күздөн баштап ЖОЖдордун программаларына киргизилет. Ал эми кулжа айынын ортосунан баштап kitap.kz сайтына жүктөлүп, электрондук түрдө жеткиликтүү болот. Ошондой эле, акысыз видео-дарстар да атайын интернет порталдарына жүктөлөт.

НАЗГУЛЬ КОЖАБЕК, УЛУТТУК КОТТОРМО БЮРОСУНУН ДОЛБООР ЖЕТЕКЧИСИ:

- Видео-дарстар ар бир окуу китеби боюнча 25 дарс түрүндө жасалат. Ар биринин орус жана казак тилдериндеги нускалары болот. Окуу китептердин электрондук нускалары “ридер” форматында 100kitap.kz сайтында жана өлкөбүздүн ачык китепканасынын kitap.kz сайтында жеткиликтүү болот.

Улуттук котормо бюро өкүлдөрүнүн айтымында, «Казак тилиндеги 100 китеп» долбоорунун алакагында бүгүнкү күндө кийинки 30 китеп которулуп жатат. Алардын арасында стратегиялык менеджмент, адам ресурстарын башкаруу, эл аралык бизнес жана маркетингге тиешелүү окуу китептери бар.