Өзбекстанда Абай Кунанбаевдин туулган күнү белгиленди

Өзбекстанда улуу казак акыны, философ Абай Кунанбаевдин туулган күнү белгиленди. Салтанаттуу иш-чара улуу акындын Ташкенттеги эстелигине гүл коюп, жаркын элесине таазим кылуу менен башталды. Коомчулук эки өлкөдө тең аттын кашкасындай таанымал болгон акындын баалуу эмгектерине токтолушту. Жаштар казак жана өзбек тилдеринде ырларын окушту. Келген коноктор Абайдын туулуп өскөн жери Семей аймагынан атайын барган көчмө көргөзмөгө күбө болушту. Эскерте кетсек, быйыл чын куран айында Өзбекстан президенти Абайдын чыгармачылык мурасын терең изилдеп, жайылтуу тууралуу жарлыкка кол койгон. Ошондон баштап Абай мурастары өзбек тилинде жарыяланып келет. Өзбекстан жазуучулар биримдиги Абайдын туулган күнүндө өзбек тилине которулган тандалган чыгармалар жыйнагынын тушоосун кести. Чыгыш шайырлары аны менен бирге «Өзбекстан менен Казакстандын адабий байланышы» жана Казак акындарынын  40 ырын которуп чыгарышкан.

МЕХМОН ИСЛОМХАНОВ, ӨЗБЕКСТАН ЖАЗУУЧУЛАР БИРИМДИГИНИН КАЗАК АДАБИЯТЫ КЕҢЕШИНИН ЖООПТУУ КАТЧЫСЫ:

- Абай түбөлүк жашайт. Анткени Абайдын жазып калтырган сөз берметтери менен кайталангыс чыгармалары бизге өмүр сүрүүнүн эң мыкты жана туура жолдорун көрсөтүп келет. Дүйнөгө башка көз караш менен кароого үйрөтөт, ааламга болгон сүйүүсүн даңазалайт. Ал адамгерчиликтүү болууга үндөгөн өлбөс эмгек калтырып кетти.

КЛЫКБЕК ЕСДАУЛЕТ, КАЗАКСТАН ЖАЗУУЧУЛАР БИРИМДИГИНИН ТӨРАГАСЫ:

- Улуу муундагы агаларыбыз, улуу аксакалдарыбыз ар дайым  туугандык, достук көңүлдөрү менен бири-биринин чыгармаларын окуп, аларды которуп жайылтып келишкен. Алардын алакасы мыкты болгон. Ал эми биз ошол достукту кийинки муунга жеткирүүнү каалап, ушул тарыхый документке кол койдук. Анын ичинде  Анталогияларды алмашуу, китептерди которуп чыгаруу бар. Мындан тышкары гезит-журналдар арасындагы байланыш, бири-бири менен материалдарды алмашып чыгаруу да камтылган.